۸صبح، کابل: ایراني چارواکي وايي چې د روان کال په لومړیو شپږو میاشتو کې د تېر کال پرتله په خراسان رضوي کې له افغانستان سره پر پوله د صنعتي نشهيي توکو کشف څلور برابره ډېر شوی دی.
ایرنا خبري اژانس دوشنبه د تلې پر ۲۰مه راپور ورکړی چې د خراسان رضوي پوله ساتي قوماندان ویلي چې په دې موده کې د تریاکو، هرویینو او صنعتي نشهيي توکو په ګډون بېلابېل ډول مخدره توکي کشف شوي دي.
د خراسان رضوي پوله ساتي قوماندان مجید شجاع زیاته کړې چې په دې موده کې د ایران او افغانستان ترمنځ پوله کې د صنعتي نشهيي توکو په ځانګړې توګه د شیشې، کشف زیات شوی دی.
د نوموړي په خبره، شاوخوا ۳۰ سلنه کشف شوي نشهيي توکي صنعتي و او ډېر پکې تریاک، هرویین او مورفین دي.
شجاع د صنعتي نشهيي توکو د بیو لوړېدل او په افغانستان کې د دغو توکو د تولید پراخېدل، د خراسان رضوي په پولو کې شیشې د کشف د زیاتېدو لامل بللی.
