۸صبح، پکتیکا: په پکتیکا کې ځايي سرچینې وايي چې په دغه ولایت کې یو کس د خپلې خور د واده په مراسمو کې وژل شوی دی.
سرچینو شنبه د تلې پر ۱۱مه ۸صبح ورځپاڼې ته وویل چې دا پېښه پرون ماښام د پکتیکا د یحیاخېلو ولسوالۍ په مټاخېلو کلي کې شوې ده.
د سرچینو په خبره، د زوم ورور هوايي او د ښادۍ ډزې کړې چې له کبله یې مرمۍ د ناوی پر ورور لګېدلې ده.
د یادونې ده چې لا هم د هېواد په ځينو سیمو کې هوايي او د ښادۍ ډزې د ودونو او ځينو نورو مراسمو کې دود دي چې کله کله مرګ ژوبله هم لري.
دا په داسې حال کې ده چې شاوخوا یوه اوونۍ مخکې د کندهار په ډنډ ولسوالۍ کې ناوې د ډزو له کبله وژل شوې وه.
