۸صبح، کابل: د ملګرو ملتونو د بشري چارو د همغږۍ دفتر (اوچا) وايي چې کاناډا د افغانستان د بشري مرستو له صندوق سره ۲.۲ میلیونه امریکايي ډالره مرسته کړې ده.
اوچا چهارشنبه د زمري پر ۱۷مه په خپله اېکسپاڼه کې یو پوسټ خپور کړی او ویلي یې دي چې دا پیسې درې میلیونه کاناډايي ډالرو سره برابرې دي.
یاد بنسټ زیاتوي چې کاناډا د دې مرستې په ګډون له ۲۰۱۹ کال راهیسې د افغانستان د بشري مرستو له صندوق سره ۱۵.۸ میلیونه کاناډايي ډالره مرسته کړې ده.
د یادونې ده چې د طالبانو واکمني او د دغې ډلې له خوا پر ښځو پراخ محدودیتونه هېواد ته د بشري مرستو د لېږد مخه نیولې ده.
تېره ورځ د افغانستان د بیارغونې لپاره د امریکا ځانګړې څارونکې ادارې یا سیګار ویلي چې واشنګټن په تېرو درېیو کلونو کې له کابل سره ۲۱ میلیارډه ډالر مرسته کړې ده.
