د کابل ښار ځینې اوسېدونکي وايي چې په دغه ښار کې د برېښنا پرچوي ډېره شوې ده. د هغوی په خبره، له څه مودې راهیسې په دغه ښار کې برېښنا کمه شوې چې لامله یې خلک له ګڼو ننګونو سره مخ دي. د کابل ښار دا اوسېدونکي زیاتوي چې په یوه شپه او ورځ کې له شپږو تر اتو ساعتونو برق لري چې د اوړي په دې ګرمو شپو او ورځو کې یې ننګونې ډېرې شوې دي.
بل پلو، د کابل ښار ځينې اوسېدونکي بیا د طالبانو تر کنټرول لاندې پر برېښنا شرکت تور لګوي چې خلکو ته د اړتیا وړ برېښنا په چمتو کولو کې ناغېړي کوي. هغوی وايي چې دا اداره سربېره پر دې چې د برېښنا په رسولو کې پاتې راغلې په خبره یې، له څه مودې راهیسې یې د تېرو میاشتو پرتله، د برېښنا بېلونه هم څو برابره لوړ کړې دي.
د کابل ځينې اوسېدونکي زیاتوي چې په هېواد کې د هوا له ګرمېدو سره سم، طالبانو ډېره برېښنا د دولتي ادارو د سړلو او ځانته د اسانتیاوو رامنځته کولو په موخه ځانګړې کړې او په وینا یې، عادي وګړي یې له پامه غورځولي دي.
د کابل ښار اوسېدونکی محمدیاسین په دغه ښار کې د برېښنا له دوامدارې پرچوۍ سر ټکوي. نوموړی وايي چې په یوې شپه او ورځ کې یوازې د شپې له خوا پنځه ساعته برېښنا لري. ښاغلی یاسین ادعا کوي: «د برق پرچوي بیخي ډېره شوې ده. زموږ خواته د ماښام په اوو بجو راځي او د شپې تر ۱۱ او ۱۲ بجو پورې وي او بېرته ځي. له یوې خوا هوا ګرمه ده او بل پلو بلاکونه له برق پرته اوبه نه لري. کله چې برېښنا نه وي، اوبه هم نشته. خلک ډېر له ستونزو سره مخ دي.»
دغه راز، د ۸صبح ورځپاڼې موندنې ښيي چې د کابل صنعتي پارکونه هم د برېښنا له پرچوۍ سره مخ دي چې دا چاره د فابریکه لرونکو د اندېښنې لامل شوې ده.
بل پلو، د کابل ښار ځینې نور اوسېدونکي بیا د طالبانو تر کنټرول لاندې پر برېښنا شرکت تور لګوي چې د دومداره پرچوۍ سربېره یې د برېښنا بېلونه پورته کړې دي.
د کابل ښار شپږمې ناحیې اوسېدونکی موسی وايي چې په تېرو دوو میاشتو کې یې د برېښنا بېل د تېرو میاشتو پرتله څو برابره ډېر راغلی دی. موسی زیاتوي: «د برقونو پرچوي ډېره ده. د شپې له خوا راځي او بېرته د شپې له خوا ځي؛ خو بېلونه یې ډېر راځي. ما په حمل او ثور میاشتو کې ۶۰۰ او ۷۰۰ افغانۍ تحویل کړې؛ خو په جوزا میاشت کې سره له دې چې برېښنا هم ډېره نه وه، خو بېل یې له څلور زرو افغانیو ډېر راغی او څوک هم د پوښتنې نه شته چې ولې.»
اخوا، د کابل په صنعتي پارکونو کې یوه فابریکه لرونکي ۸صبح ورځپاڼې ته وویل چې په تېره یوه میاشت کې یې د ورځې تر اتو ساعتونو د برېښنا پرچوي لرله چې دې چارې د کابل په صنعتي پارکونو کې د توکو پر تولید ناوړه اغېز کړی دی.
د کابل ښار اوسېدونکي داسې مهال په دغه ښار کې د برېښنا پرچوۍ له ډېرېدو سر ټکوي چې د ځينو نورو ولایتونو برېښنا هم له ګاونډیو هېوادونو واردېږي. د ډېرو ولایتونو اوسېدونکي هم په ژمي او هم په اوړي کې د برېښنا له کمښته شکایت لري.
