د اسرائیل او حماس ترمنځ د اوربند هوکړه په رسمي ډول د قطر په پلازمېنه دوحه کې د دواړو خواوو د مرکچیانو له خوا لاسلیک شوې ده.
فاکسنیوز راپور ورکړی چې د اسرائیل او حماس استازو جمعه د جنورۍ پر ۱۷مه په دوحه کې د غزې اوربند او د یرغمل شویو کسانو د خوشې کولو هوکړه لاسلیک کړې ده.
په راپور کې راغلي چې د اسرائیل کابینه به په راتلونکو څو ساعتونو کې د دې هوکړې په تړاو رایه ورکړي.
د راپور پر بنسټ، د اوربند هوکړې له لاسلیک وروسته، د حماس له خوا د نیول شویو ۹۸ یرغمل شویو کسانو کورنیو ته د وروستیو تحولاتو په هکله خبر ورکړل شوی دی.
د یادونې ده چې د اسرائیل او حماس ترمنځ د اوربند هوکړې په نړیواله کچه غبرګونونه راپارولي دي.
ملګرو ملتونو سرمنشي انتونیو ګوترېش د اسرائیل او حماس ترمنځ د اوربند له هوکړې هرکلی او پر بشپړ پلي کېدو یې ټینګار کړی دی.
متحده ایالات، مصر او قطر به له دې هوکړې څارنه وکړي.
