سنتکام اټکل کړی، چې له افغانستانه د دغه هېواد ځواکونو د وتلو بهیر ۵۰ سلنه بشپړ شوی دی.
د امریکا د مرکزي ځواکونو قوماندانۍ یا سنتکام د غبرګولي په اتلسمه د یوې خبرپاڼې په خپرولو سره ویلي، د امریکا ولسمشر جو بایډن له پرېکړې سره سم له افغانستانه د دغو ځواکونو د وتلو له پیلېدو راهیسې، ۵۰۰ سي ۱۷ الوتکې له افغانستانه لېږدول شوې دي.
د امریکا د مرکزي قوماندانۍ په وینا، په دې موده کې یو زر او ۳۰۰ قطعې وسایل د ملي دفاع وزارت لوژستیکي څانګې ته د ویجاړېدو لپاره لېږل شوي دي.
سنتکام ویلي، دا اضافي شخصي وسایل دي او په دغو توکو کې لوی دفاعي وسایل نشته.
د امریکا مرکزي قومانداني زیاتوي، تراوسه یې شپږ پوځي اډې د افغانستان ملي دفاع وزارت ته سپارلې دي. د نوموړې قوماندانۍ په خبره، نور پوځي توکي به هم په هېواد کې د ثبات او د خلکو د ساتنې لپاره افغان امنیتي ځواکونو ته وسپاري.
له افغانستانه د امریکايي ځواکونو د وتلو لړۍ د می په لومړۍ پېل شوه او تمه ده چې دغه بهیر د سپتمبر تر یوولسمې نېټې پای ته ورسېږي. د امریکايي ځواکونو له وتلو سره سم، ناټو ځواکونه هم له افغانستان څخه وځي.