چین او امریکا هوکړه کړې چې د یو بل پر وارداتي توکو به شاوخوا ۶۰ میلیارد ډالره لګول شوې تعرفې کمې کړي.
رویټرز دوشنبه د سپټمبر پر ۲۸مه راپور ورکړی چې د دغې هوکړې له مخې دواړو هېوادونو وړاندیز کړی چې د یو بل د ۳۰ میلیاردو ډالرو په ارزښت د ناحساسو توکو پر صادراتو تعرفې کمې کړي.
د امریکا د سوداګرۍ استازي جیمسون ګریر ویلي، دا هوکړه چینایي بازار ته د امریکا د شاوخوا ۳۰ سلنه صادراتو لاسرسی اسانه کولی شي.
د سپینې ماڼۍ له لوري د خپاره شوي نوملړ له مخې، چین به د امریکا پر ځینو کرنیزو محصولاتو، لکه غنمو، غوښې، لبنیاتو او نباتي غوړیو تعرفې کموي.
چین به د امریکا پر ځینو نورو محصولاتو لکه کبانو او سمندري خوړو، لرګیو، سینګارتوکو او طبي تجهیزاتو هم تعرفې کمې کړي.
د تعرفو دا متقابل کمښت د هغو هوکړو برخه ده چې په واشنګټن کې د امریکا د ولسمشر ډونالډ ټرمپ او د چین د ولسمشر شي جینپینګ په وروستۍ لیدنه کې پرې سلا شوې ده.
