۸صبح، کابل: د چین د بهرنیو چارو وزیر ویلي چې د افغانستان پرخلاف اقتصادي بندیزونه باید لیرې شي.
رویټرز خبري آژانس رپوټ ورکړی چې د چین د بهرنیو چارو وزیر وانګ یي دا موضوع د شل ډلې د غړو په ناسته کې مطرح کړې ده.
د چین د بهرنیو چارو وزیر په دغه ناسته کې د افغانانو وضعیت ته په پام سره ویلي چې د افغانستان برخلاف باید اقتصادي بندیزونه پای ته ورسېږي.
هغه د افغانستان بانک د اسعارو زېرمو ته په اشارې سره زیاته کړې چې دا د افغانانو شتمني ده او باید دوی ته ورکړل شي.
وانګ یي ټینګار کړی چې له دغو پیسو باید د افغانانو له خوا کار واخیستل شي او باید چې د سیاسي ناندریو لپاره ونه کارول شي.
چین په داسې حال کې د اقتصادي بندیزونو پای ته رسولو ته اشاره کړې چې امریکا د افغانستان بانک د ۹،۴ میلیارد ډالرو په ارزښت شتمني کنګل کړې ده. دغه هېواد ویلي چې طالبان باید دغو زېرمو ته لاسرسی ونه لري.
طالبانو د زمري په ۲۴مه نېټه کابل ونیوه او تراوسه هېڅ هېواد د دوی حکومت په رسمیت نه دی پېژندلی. نړیوالې ټولنې ویلي چې د طالبانو د په رسمیت پېژندلو لپاره بیړه نه لري.
