۸صبح، کابل: د افغانستان په چارو کې د چین ځانګړي استازي یو شیاویونګ د طالبانو د بهرنیو چارو له سرپرست وزیر امیرخان متقي سره لیدلي او هغه ته یې د ګاونډیو هېوادونو د بهرنیو چارو وزیرانو په راتلونکې غونډه کې د ګډون بلنه ورکړې ده.
دا موضوع د طالبانو د بهرنیو چارو وزارت د ویاند مرستیال ضیااحمد تکل دوشنبه د لیندۍ پر ۵مه د اېکسپاڼې لارې په یو خپاره کړي بیان کې مطرح کړې ده.
د تکل په وینا، شیاویونګ له متقي غوښتي چې د ګاونډیو هېوادونو د بهرنیو چارو وزیرانو په راتلونکو غونډه کې ګډون وکړي.
د چین ځانګړي استازي زیاته کړې چې هېواد یې د طالبانو ارزښتونو او اختیارونو ته درناوی لري.
د بیان پر بنسټ، په دې لیدنه کې دواړو خواوو د طالبانو او چین ترمنځ د دوه اړخیزو اړیکو پر پراختیا، اقتصادي همکاریو او سیمهییزو چارو خبرې کړې دي.
همداراز د طالبانو د بهرنیو چارو وزارت سرپرست هم د دغې ډلې او چین ترمنځ د سوداګرۍ ډېرښت مثبت ارزولی دی.
چین طالبان په رسمیت نه پېژني، خو له تېرو درېیو کلونو راهیسې یې له دغې ډلې سره نږدې ډيپلوماټیکې اړیکې ساتلې دي.
نوموړي چینايي ډيپلوماټ څو ورځې مخکې پاکستان ته د خپل سفر پرمهال د دغه هېواد له چارواکو سره د افغانستان د سولې په تړاو خبرې کړې وې.
