۸صبح، کابل: د تمدن ټلوېزیون د فعالیت بندېدو د پرېکړې لامل په هکله د طالبانو د عدلیې وزارت له اعلان وروسته، دغې شبکې په دغه وزارت کې د شته اسنادو د بې پرې څېړنې غوښتنه کړې ده.
د دغې شبکې په اعلامیه کې چې جمعه د غبرګولي پر ۱۸مه خپره شوې، راغلي، تمدن ټلوېزیون په ۲۰۰۴ کال کې د اسلامي حرکت له ګونده د ایتالله محسني تر استعفا وروسته تاسیس شو او دغه ګوند سره هېڅ تړاو نه لري.
د طالبانو د عدلیې وزارت ویاند قاري برکتالله رسولي د تمدن ټلوېزیون د بندېدو لامل په هکله د پوښتنې په ځواب کې ویلي چې دا شبکه په یو سیاسي ګوند پورې تړاو لري او په وینا یې، ځمکه یې هم دولتي ده.
د اعلامیې په متن کې راغلي: «تمدن ټلوېزیون، خاتمالنبیین مدرسه او [پوهنتون] د اسلامي حرکت لغوه شوي ګوند پورې تړاو لري او ودانۍ یې هم په غصب شوې ځمکه کې جوړه شوې چې له همدې کبله د دغو درېيو بنسټونو فعاليت بند او د عدليې وزارت له خوا يې دفترونه تړل کېږي.»
تمدن ټلوېزیون په ډاګه کړې چې د نوموړي ټلوېزیون ودانۍ او د خاتمالنبیین مدرسه په شخصي ځمکه کې د شرعي او قانوني سند په لرلو سره جوړې شوې او دولتي نه دي.
په همدې ترتیب د خاتمالنبیین پوهنتون په یوې کرايي ودانۍ کې فعالیت کوي او مالکیت یې هم محمدجواد حسیني او عبدالقیوم ته ورګرځي.
ورته مهال د دغه ټلوېزیون مسوولانو د طالبانو له عدلیې وزارته غوښتي چې د دغو بنسټونو د ځمکو او د اسلامي حرکت له ګوند سره چې ایتالله محسني ترې ۱۹ کاله پخوا استعفا کړې د هغوی د تړاو اسنادو د څېړنې لپاره یو پلاوی جوړ کړي.
تېره ورځ د طالبانو د عدلیې وزارت یو پلاوی په کابل ښار کې د تمدن ټلوېزیون دفتر د تړلو په موخه ورغلی و؛ خو له شاوخوا یو ساعت خبرواترو وروسته یې دا پرېکړه شنبه (غبرګولي ۱۹) ته وځنډوله.
