۸صبح، کندهار: په کندهار کې ځايي سرچینې وايي چې په چمن – سپین بولدک کې د احتجاجکوونکو او پاکستاني ځواکونو ترمنځ د نښتې په پاېله کې څلور پرلت کوونکي وژل شوي او ۲۱ نور ټپيان دي.
احمدخان چې په دغه پرلت کې یې برخه اخیستې، ۸صبح ورځپاڼې ته ویلي چې پاکستاني ځواکونو پرې نن شنبه د غويي پر ۱۵مه د ماسپښین شاوخوا ۱:۰۰ بجه برید کړی دی.
نوموړي زیاته کړې چې له پېښې وروسته احتجاجکوونکو پرېکړه وکړه چې د چمن – ګوتي دروازه د هر ډول تګراتګ پرمخ وتړي.
پرلت کوونکو زیاته کړې چې پاکستاني حکومت ته یې یوه میاشت وخت ورکړی؛ څو په خبره یې، غوښتنې یې ومني، که نو د اسلاماباد پر لور به احتجاج پېل کړي.
دا په داسې حال کې ده چې د زرګونو کسانو دا پرلت د پاکستان حکومت د هغې پرېکړې په غبرګون کې له څو میاشتو راهیسې روان دی چې پر ډیورنډ کرښه د اوښتو را اوښتو لپاره پاسپورت او ویزه حتمي کوي.
که څه هم پاکستاني حکومت له دې وړاندې هم د پرلت خورولو لپاره د تاوتریخوالي او ډزو په ګډون بېلابېلې لارې کارولې دي؛ خو پرلت کوونکي وايي چې تر هغه له خپل دریځه نه په شا کېږي چې غوښتنې یې پوره شوې نه وي.
