۸صبح، کابل: د پنجاب پولیسو اعلان کړی چې تر اوسه یې په دغه ایالت کې څه باندې ۲۱ زره افغان کډوال نیولي او ایستلي دي.
د پنجاب پولیسو پنجشنبه د لړم پر ۸مه ویلي چې د دغو کسانو ډېر یې په لاهور کې تر نیول کېدو وروسته کمپونو ته لېږلي دي.
د پولیسو په خبره، لا هم د ښارونو په مرکزونو کې څه باندې درې زره کډوال شته.
د پولیسو په خبرپاڼې کې راغلي: «د ایستل شویو کسانو له ډلې اووه زره او ۶۷۱ یې نارینه، څلور زره او ۷۶۵ یې ښځې او نهه زره او ۵۲۱ یې ماشومان دي.»
ورته مهال د راولپېنډۍ پولیسو هم اعلان کړی چې په تېرو ۲۴ ساعتونو کې ۱۱۰ زره ناقانونه افغان کډوال نیولي دي.
د پنجاب پولیسو له دې وړاندې هم ویلي و چې د افغانانو د نیولو او ځپلو لپاره یې عملیات پيل کړي دي.
دا نیونې د طالبانو او پاکستان ترمنځ د وروستیو نظامي او ډيپلوماتیکو ترینګلتیاو وروسته ډېرې شوې دي.
