۸صبح، ننګرهار: ځايي سرچینې وايي چې د تورخم په دروازه کې د طالبانو او پاکستاني ځواکونو ترمنځ نښته شوې ده.
سرچینو چهارشنبه د لړم پر ۶مه، له ۸صبح ورځپاڼې سره په خبرو کې ویلي چې دغه نښته نن سهار پیل شوې او د دواړو لورو ترمنځ په وقفه يي ډول لا هم دوام لري.
د سرچینو په وینا، دواړو لورو د نښتې پر مهال له سپکو او درنو وسلو کار اخیستی دی. د پاکستاني ځواکونو د ډزو له امله له پاکستانه افغانستان ته يو را اړول شوی ماشوم او د تورخم په ښارګوټي کې د یوې مرستندویه ادارې یو کارکوونکی ټپیان شوي دي.
دا په داسې حال کې ده چې پرون هم د طالبانو او پاکستاني ځواکونو ترمنځ د پکتیکا ولایت د برمل ولسوالۍ اړوند ډېورنډ کرښې ته څېرمه د انګور اډې په سیمه کې نښته شوې وه.
پاکستاني چارواکو ویلي چې د تېرې ورځې د ماښامنۍ نښتې پر مهال د طالبانو د هاوان مرمۍ په سويلي وزیرستان کې پر یوه استوګنیز کور لګېدلې، چې له امله یې یو ملکي وګړی وژل شوی او پنځه نور ټپیان شوي دي.
