۸صبح، کابل: طالبانو اعلان کړی چې په تېرو شپږو ورځو کې ۸۱۹ کورنۍ چې ټولټال ۳ زره او ۸۵۰ کسان کېږي، په جبري توګه افغانستان ته راستنې شوې دي.
د طالبانو د ویاند مرستیال، حمدالله فطرت چهارشنبه د لړم پر ۶مه، په یوه خبرپاڼه کې ویلي چې ۱۹۹ کورنۍ چې ۹۹۹ کسان کېږي، د ننګرهار د تورخم له لارې هېواد ته راستنې شوې دي.
د فطرت په وینا، ۴۹۸ کورنۍ چې ۲ زره او ۱۹۶ کسان کېږي، د نیمروز د ورېښمو پله له لارې هېواد ته راستنې شوې دي.
همداراز، ۵۷ کورنۍ چې ۳۲۷ کسان کېږي، د کندهار د سپین بولدک له لارې او ۶۵ کورنۍ چې ۲۲۸ کسان کېږي، د هرات د اسلامکلا له لارې افغانستان ته راغلې دي.
دا په داسې حال کې ده چې ملګرو ملتونو پرون په یوه راپور کې اعلان وکړ چې په تېرو درېیو کلونو کې شاوخوا ۴.۹ میلیونه کډوال افغانستان ته راستانه شوي دي.
د دې سازمان په وینا، د کډوالو پراخې راستنېدنې پر بنسټیزو خدمتونو او کاري فرصتونو فشار زیات کړی دی.
