۸صبح، کندهار: ځايي سرچینې وايي چې د کندهار ښار په یوه سیمه کې پراخ اورلګېدلی او لا هم نه دی کابو شوی.
سرچینو چهارشنبه د لړم پر ۶مه، له ۸صبح ورځپاڼې سره په خبرو کې ویلي چې اور د غرمې شاوخوا ۱۲:۳۰ بجې د کندهار ښار د دیارلسمې ناحیې اړوند مهمند روغتون ته نږدې لګېدلی دی.
د سرچینو په وینا، د طالبانو د اور وژنې ډله د اورلګېدنې له پېښې شاوخوا نیم ساعت وروسته سیمې ته رسېدلې، خو تر اوسه نه ده توانېدلې چې اور کابو کړي.
سرچینې زیاتوي چې اور لا هم د پراخېدو په حال کې دی او لمبې یې شېبه په شېبه پراخېږي.
تر اوسه د اورلګېدنې د لامل، مالي زیانونو او احتمالي مرګ ژوبلې په تړاو معلومات نشته.
