۸صبح، کندهار: ځايي سرچینې وايي، په کندهار ښار کې د طالبانو ترمنځ د نښتې له امله د دې ډلې اووه غړي ټپیان شوي دي.
سرچینو یکشنبه د لړم پر ۱۰مه له ۸صبح ورځپاڼې سره په خبرو کې ویلي چې دا نښته د شنبې په مازیګر د کندهار ښار د لومړۍ امنیتي حوزې اړوند یوه جومات ته څېرمه شوې ده.
د سرچینو په وینا، نښته هغه مهال پیل وشوه چې په کندهار کې د طالبانو امنیه قوماندانۍ د ښاري نظم قطعې غوښتل د موټرو له ښیښو تورې پردې لرې کړي، خو له هلمند څخه کندهار ته راغلو طالبانو له دغه اقدام سره مخالفت وکړ.
سرچینې زیاتوي چې د دواړو لورو ترمنځ نښته لومړی په لفظي شخړې پیل شوې او وروسته لاس و ګرېوان ته ورسېده چې په پایله کې یې اووه طالبان ټپیان شول.
د سرچینو په خبره، له هلمند څخه راغلو طالبانو د شخصي موټرو ترڅنګ څو رنجر موټر هم درلودل او د دوو شخصي موټرو ښیښې یې هم تورې وې.
ورته مهال په میرویس حوزوي روغتون کې یوې سرچینې ویلي چې د دې پېښې اووه ټپیان دغه روغتون ته لېږدول شوي دي.
د سرچینې په وینا، د درېیو ټپیانو روغتیايي وضعیت ښه، د دوو نورو نسبتاً ښه او د پاتې دوو روغتیايي وضعیت نازک دی.
