سپینې ماڼۍ ویلي چې کولمبیا د ناقانونه کډوالو د منلو په ګډون د امریکا ولسمشر ډونالډ ټرمپ له ټولو شرایطو سره هوکړه کړې ده.
د سپینې ماڼۍ په بیان کې چې یکشنبه د جنورۍ پر ۲۶مه خپور شوی، راغلي چې کولمبیا له امریکا څخه د ایستل شويو ناقانونه کډوالو له منلو سره هوکړه کړې ده.
د بیان پر بنسټ، امریکا دا کډوال په الوتکو کې کولمبیا لېږدوي او دغه هېواد ته یې سپاري.
دا په داسې حال کې ده چې ټرمپ پرون ګواښ کړی و چې د کولمبیا له خوا د ناقانونه کډوالو د نهمنلو په صورت کې د دغه هېواد پر وارداتو تعرفې لوړوي او د دغه هېواد پر چارواکو تحریم وضع کوي.
د رویټرز راپور پر بنسټ، د کولمبیا د بهرنیو چارو وزیر لوېس ګیلبرټو موریو ویلي: ««موږ د متحده ایالاتو له حکومت سره له بنبست څخه تېر شوي یو.»
په همدې حال کې سپینې ماڼۍ ویلي چې د تعرفو لګولو اجرائیوي فرمانونه ځنډول شوي او تر هغو چې کولمبیا له دې هوکړې څخه سرغړونه ونهکړي، نه یې لاسلیکوي.
کولمبیا په لاتینه امریکا کې د متحده ایالاتو درېیم لوی سوداګریز شریک دی.
دا په داسې حال کې ده چې ټرمپ خبرداری ورکړی چې د ناقانونه کډوالۍ د مخنیوي لپاره به د فبرورۍ تر لومړۍ نېټې پورې پر کاناډا او مکسیکو درنې تعرفې ولګوي.
ډونالډ ټرمپ د خپل ټاکنیز کمپاین پرمهال خبرداری ورکړی و چې امریکا ته به د ناقانونه کډوالۍ پر وړاندې جدي اقدامات وکړي او په وینا یې، هغه هېوادونه به سخت وځپي چې دا بهیر اسانه کوي.
