د لږترلږه درېیو میاشتو لپاره د امریکا مالي مرستو له ځنډېدو وروسته، د دغه هېواد د بهرنیو چارو وزیر مارکو روبیو د ژغورنې مرستو لپاره د معافیت امر صادر کړی دی.
رویټرز چهارشنبه د جنورۍ پر ۲۹مه راپور ورکړی چې روبیو دا امر تېره ورځ صادر کړی دی.
د رویټرز راپور پر بنسټ، مارکو روبیو تېره جمعه د خوراکي مرستو، په ځانګړې توګه د سوریې او سوډان لپاره هم معافیت وضع کړی و.
ورته مهال، سياېناېن راپور ورکړی چې یو فدرالي قاضي د ولسمشر ډونالډ ټرمپ له خوا د امریکا د مرستو ځنډېدو فرمان په لنډمهالي ډول ځنډولی دی.
پر امریکا د ټرمپ له واکمنېدو وروسته دغه هېواد د بشرپاله مرستو په ګډون ټولې مالي مرستې ځنډولي دي.
د دغه اقدام موخه د امریکا د مالي مرستو ارزونه بلل شوې څو په ډاګه شي چې دا مرستې تر کومې کچې د واشنګټن په ګټه دي.
دا په داسې حال کې ده چې د امریکا مالي مرستو ځنډېدو د یو شمېر سازمانونو په ځانګړې توګه په افغانستان کې مرستندویه بنسټونه اغېزمن کړي دي.
