په هرات کې د پاشدان بند ودانيزې چارې په بشپړېدو دي

د اوبو چارو د تنظيم ملي ادارې لخوا په خبرپاڼه کې راغلي دي چې، د هرات ولايت په کرخ ولسوالۍ کې د پاشدان بند ودانيزې چارې په چټکۍ سره روانې دي او ډېر ژر به ګټې اخيستو ته وسپارل شي.
د اوبو چارو د تظنيم ملي ادارې وياند نظام خپلواک له ۸صبح سره په خبرو کې وويل چې د پاشدان بند هم د دې ادارې له سترو پروژو څخه دی چې ۱۱۷ ميليون ډالر لګښت پرې راځي. نوموړي همداراز وويل چې، دغه بند به د ۵۴ ميليون متر مکعبه اوبو د زېرمه کولو ظرفيت ولري او ۱۳زره هکټاره کرنيزه ځمکه به خړوبه کړي.
د اوبو چارو د تنظيم ملي اداره وايي چې د دې بند د جوړولو موخه د موسمي سېلابونو کنټرول، د کرنيزو ځمکو خړوبول، د برېښنا توليد او په ټول کې د اوبو مديريت دی.
د يادونې وړ ده چې د پاشدان بند ترڅنګ په کابل کې د شاه و عروس او په بدخشان کې شورابک هم هغه بندونه دي چې د اوبو د مديريت په موخه جوړېږي او کارونه يې روان دي.