۸صبح، هرات: په هرات کې ځايي طالب چارواکي وايي چې په دغه ولایت کې د زعفرانو نهم جشن یا فیستوال جوړ شوی دی.
په هرات کې د کرنې، اوبو لګولو او مالدارۍ ریاست پنجشنبه د لړم پر ۲۴مه ویلي چې په دغه ولایت کې سږکال د زعفرانو حاصلات ۲۰ سلنه ډېر شوي دي.
نوموړي ریاست زیاته کړې چې دا مهال په څه باندې نهه زره او ۵۰۰ هکتاره ځمکې زعفران کرل شوي او له ۱۰۰ ډېر شرکتونه بیا د زعفرانو پر تولید، پروسس او صادراتو بوخت دي.
یاد ریاست ویلي چې ۴۰ زره کورنۍ له دې لارې د ژوند اړتیاوې پېدا کوي.
د یادونې ده چې دا مهال په هرات کې یو کیلو ښه زعفران له ۸۵ تر ۹۰ زرو افغانیو بیه لري.
په هرات کې د کرنې ریاست د شمېرو په حواله، تېر کال په دغه ولایت کې ۳۰ ټنه زعفران تولید شوي وو؛ خو سږ کال ۴۰ ټنو پورې رسېدلي دي.
هرات په هېواد کې د زعفرانو لوی تولید کوونکی ولایت شمېرل کېږي او دا بوټی تر ډېره د دغه ولایت په غوریان، پښتونزرغون، انجیل او زندهجان ولسوالیو کې کرل کېږي.
