د ولسوالیو پرلپسې سقوط؛ د وسله وال پوځ اعلی سرقوماندان درې ورځې غونډه وکړه

د طالبانو د بریدونو له زیاتوالي او د دغې ډلې له خوا د یو شمېر ولسوالیو له نیولو وروسته، د هېواد د وسله وال پوځ د اعلی سرقوماندان محمد اشرف غني په مشرۍ درې ورځې پرلپسې ناستې وشوې.
د ارګ د اعلان له مخې، ولسمشر په دغو ناستو کې د هېواد د امنیتي او دفاعي ځواکونو پر لازیاتې همغږۍ ټینګار وکړ.
د غبرګولي په ۲۵مه نېټه په ولسمشرۍ ماڼۍ کې د غونډې پرمهال محمد اشرف غني امنیتي ادارو ته حکم کړی چې د دښمن د ناوړه دسیسو د شنډولو او د خلکو د امنیت د ساتلو په موخه خپلې هڅې ګړندۍ او بیړني اقدامات وکړي.
د ارګ د اعلان پر بنسټ د وسله وال پوځ د اعلی سرقوماندانۍ په ناسته کې د هېواد د عمومي امنیتي وضعیت په اړه بحث او خبرې وشوې.
اخوا، په دغه ناسته کې د هېواد د امنیتي او دفاعي ادارو مسوولینو د امنیتي وضعیت، د طالبانو د بریدونو او ددغو بریدونو په وړاندې د مقابلې په اړه ولسمشر ته رپوټ وړاندې کړ.
د وسله والو ځواکونو د اعلی سرقوماندانۍ ناستې د غبرګولي په ۲۳مه او ۲۴مه نېټه هم ترسره شوې چې د هېواد د امنیتي وضعیت په اړه پکې یو لړ پرېکړې وشوې.
دا په داسې حال کې دي، چې په دې وروستیو کې د هېواد په بېلابېلو برخو کې د طالبانو بریدونه زیات شوي دي. په تېرو دوو میاشتو کې شل ولسوالۍ د طالبانو لاس ته ورغلې چې دې چارې د خلکو اندېښنې راپارولې دي.