۸صبح، کابل: د روغتیا نړیوال سازمان که څه هم په افغانستان کې د کورونا ناروغانو د مړینې د کموالي څخه خبر ورکړی؛ خو ویلي یې دي، چې له ۲۰۲۰ کال راهیسې ۹۷ روغتیایي کارکوونکي او لږ تر لږه ۷ زره او ۲۸۷ تنه نور وګړي د کورونا ویروس له امله مړه شوي دي.
د روغتیا نړیوال سازمان دوشنبه د غویي پر ۲۶، دغه شمېرې خپرې کړې او ویلي یې دي، چې افغانستان کې د کورونا د خپرېدو له پیل راهیسې، لږ تر لږه ۴ زره او ۷۴۹ روغتیایي کارکوونکي پر کورونا اخته شوي دي.
د دغه سازمان د شمېرو له مخې، د کورونا د خپروېدو له پیل راهیسې په هېواد کې ۵۵۸ زره او ۲۳۰ بېلګې ازمویل شوې او لږ تر لږه ۷ زره او ۲۸۷ تنه د کورونا له امله مړه شوي دي.
یوازې د ۲۰۲۲ زېږدیز کال تر دوولسمې اوونۍ ۴ زره او ۲۸۷ بېلګې ازمویل شوې او د ۸ تنو د مړینې راپور ورکړل شوی دی.
د روغتیا نړیوال سازمان ویلي، چې خپرې شوې شمېرې د روان کال په دوولسمه اوونۍ کې د اخته کېدو کچې د ۵۱ سلنې کمښت او د همدې کال د یوولسمې اوونۍ په پرتله د مړینې کچې د ۲۷ سلنې کمښت ښودنه کوي.
د دغه سازمان په وینا، په ټوله کې او د وروستیو اوونیو پر شمېرو سربېره، د ۲۰۲۰ کال له فبرورۍ راهیسې، په افغانستان کې د کورونا ۱۷۷ زره او ۵۴۸ بېلګې ثبت شوې او د کورونا له امله د ۷ زره او ۷۲۶ تنو مړینه ثبت شوې ده.
د ویلو ده، چې په وروستیو اوونیو کې ډېری مثبتې پېښې په سویلي، ختیځو او مرکزي ولایتونو کې ثبت شوې دي.
دغه شمېرې په داسې حال کې خپرېږي، چې په هېواد کې له وروستیو بدلونونو وروسته په کورونا د اخته کسانو د شمېرو په اړه کره معلومات نه ورکول کېږي.
