د روغتیا نړیوال سازمان په نړۍ کې پر کرونا ویروس د اخته کېدونکو شمېر له ډېرېدو اندېښنه ښوولی او ویلي دي چې تېره میاشت په نړۍ کې د دغه ویروس له امله نږدې ۱۰ زره کسان مړه شوې دي.
نړیوالو رسنیو شنبه د جنورۍ پر ۱۳مه راپور ورکړی چې د دغه سازمان مشر ټیډروس ادهانوم قبریاسوس، په رخصتیو کې د راټولېدنې او سړې هوا ته په اشارې ویلي چې د تېر کال په ډسمبر کې د نړۍ د نږدې ۵۰ هېوادونو په روغتونونو کې د کرونا ویروس له کبله د اخته شویو د بستري کېدو کچه ۴۲ سلنه زیاته شوې ده.
د نوموړي په خبره، ډېری دا پېښې په اروپا او امریکا کې ثبت شوې دي.
د روغتیا نړیوال سازمان مشر په جینوا کې خبریالانو ته ویلي: «که څه هم په میاشت کې د لس زره کسانو مړینه د وبا د لومړیو په پرتله ډېره ټيټه ده؛ خو د مخنیوي وړ دا ډول مړینې د منلو نه دي.»
نوموړي له حکومتونو غوښتي چې پر کرونا ویروس څار ولري او خلکو ته د واکسین د لاسرسي او درملنې په تړاو ډاډ ورکړي.
قبریاسوس زیاته کړې چې د کرونا ویروس نوې بڼه JN.۱ نومېږي او دا په نړۍ کې «ښکاره بڼه» ده.
د هغه په باور، دا د اومیکرون نوې بڼه ده او د مخنیوي لپاره یې کولای شو اوسني واکسینونه وکاروو.
د راپورونو په حواله، د تېر کال د ډسمبر په وروستۍ اوونۍ کې د امریکا د کوویډ – ۱۹ په روغتونونو کې د بستري کېدو کچه ۲۰ سلنه لوړه شوې ده.
د یادونې وړ ده چې کرونا ویروس لومړی ځل په ۲۰۲۰ کال کې د چین په اووهان ښار کې ښکاره او په چټکۍ نورو هېوادونو ته خپور شو.
په افغانستان کې هم د دغه ویروس لومړۍ پېښه د ۱۳۹۸ په کب میاشت کې ثبت شوه. له هغې مودې راوروسته په هېواد کې لسګونه زره کسان پر دغه ویروس تر اخته کېدو وروسته مړه شوې دي.
