په هېـواد کې د کورونا واکسین تطیبق پیل شو

د کب په پنځمه نېټه چې په هېواد کې د کورونا ویروس د لومړنۍ بېلګې یو کال پوره شوه، د کورونا ویروس تطبیق پیل شو.
د واکسین دغه بهیر په ارګ ماڼۍ کې د ولسمشر غني او یو شمېر لوړپوړو حکومتي او روغتیایي چارواکو له خوا پیل شو. په دې پړاو کې به ۵۰۰ زره دوزه واکسین چې د هند له خوا مرسته شوي ۲۵۰ زره تنو ته ورکړل شي.
د طلوع نیوز خبریاله انیسه شهید هغه لومړۍ وګړې وه چې کورونا واکسین ورکړل شول. په دغو مراسمو کې د ملي امنیت، پولیسو او ملي اردو په استازیتوب یو شمېر نورو ته د کورونا واکسین ورکړل شول.
ولسمشر محمد اشرف غني په دغو مراسمو کې کورونا ویروس یو غمیزه وبلله چې په ټوله نړۍ کې خپور شو، خو په افغانستان کې په ښه توګه مدیریت شو.
د هغه په وینا، لومړۍ ارزونه دا وه چې ددغه ویروس خطر به ډېر زیات وي، خو په تدبیر سره د ویروس په لومړۍ او دوهمه څپه کې دا خطر مدیریت شو.
ولسمشر غني ټنیګار وکړ چې د کورونا خطر نه دی لیرې شوی او نوي ډولونه یې تل راڅرګندېږي. هغه له خلکو وغوښتل چې روغتیایي سپارښتنو ته پاملرنه وکړي.
ولسمشر روغتیايي کارکوونکي له کورونا ویروس سره په مبارزه کې واقعي اتلان وبلل او وې ویل چې د هغو روغتیایي کارکوونکو په یاد څلی جوړېږي چې له دغه ویروس سره د مبارزې په لومړۍ لیکه کې مړه شوي دي.
محمد اشرف غني له هند څخه ددغه واکسین د مرستې له امله مننه وکړه. هغه زیاته کړه چې لومړی پړاو په ۵۰۰ زره دوزو سره پيلېږي او د عامې روغتیا وزارت او خلکو لپاره یوه آزموینه ده.
ولسمشر غني ووېل چې د کورونا ویروس د دوهم پړاو د پلي کولو لپاره د سرچینو د برابرولو په موخه هڅې روانې دي چې د هېواد څلوېښت سلنه وګړي به تر پوښښ لاندې راولي.
د عامې روغتیا وزارت سرپرست وحید مجروح په دغو مراسمو کې ووېل چې د کورونا واکسین، په لومړي پړاو کې روغتیايي کارکوونکو، امنیتي ځواکونو او د رسنیو کارکوونکو ته ورکول کېږي.
هغه د کورونا ویروس د واکسین عادلانه تطبیق د عامې روغتیا وزارت اصلي مسوولیت وباله او له خلکو، مدني ټولنو او رسنیو یې وغوښتل چې له روغتیا وزارت سره ددې مسوولیت په ترسره کولو کې همکاري وکړي.
په افغانستان کې د هند سفیر رودرندرا تاندن په دغو مراسمو کې ووېل چې د کورونا ویروس خپرېدو پر نړۍ جدي اغیز وکړ او پر اقتصادي زیانونو سربېره یې ځاني تلفات هم واوړل. د هغه په وینا، له نړیوال یووالي او همکارۍ پرته له کورونا ویروس سره مبارزه شونې نه ده.
هغه زیاته کړه، د کورونا ویروس خپرېدو وښودله چې له دغه ویروس سره د مبارزې لپاره لازم نړیوال یووالی نه دی رامنځته شوی. د هند سفیر له افغانستان سره د خپل هېواد مرسته له کورونا ویروس سره د مبارزې لپاره د نړیوال وحدت د رامنځته کېدو په موخه هڅه وبلله.
د وېلو ده چې په افغانستان کې د کورونا ویروس لومړۍ بېلګه د تېر کال د کب په پنځمه نېټه ثبت شوه. د رسمي شمېرو له مخې، تراوسه په افغانستان کې څه د پاسه ۵۵ زره تنه په دغه ویروس اخته شوي او له دوه زره زیات مړه شوي دي.