کرونا ويروس او پر ورزشي نړۍ يې اغېز

کرونا ويروس د نړۍ د نورو برخو ترڅنګ پر ورزش هم خپلې ژورې اغېزې لرلي دي.
له کوم وخته چې دغه وژونکی ويروس د نړۍ مختلفو هېوادونو ته خپور شو، نو د روغتيا، اقتصاد، تعليم، هنر، فرهنګ او نورو برخو ترڅنګ يې د ورزش پر نړۍ هم خپل اغېز وکړ او د نړۍ ستر ورزشي ليګونه يې د خنډ او ځنډ سره مخ کړل.
روغتيا پوهان ټينګار لري چې د کرونا ويروس د مخنيوي لپاره بايد له ګڼه ګوڼې وګړي لرې پاتې شي خو ورزش بيا پرته له ګڼ چاپيرياله نه تر سره کيږي او که ترسره هم شي نو هغه واقعي شور او زور به يې نه وي.
د کرونا وبا له وېرې د نړۍ په بېلابېلو هېوادونو کې د کرکټ، فوټبال، باسکيټبال، ټېنيس، رګبي، ګلف، بايسکل ځغلونې او نورو لوبو نړيوال او کورني کلپونه او سيالۍ لغوه شوې دي او يا هم ځنډېدلې دي.
د دې ترڅنګ ددغو لوبو په درېدو او ځنډېدو سره ګڼ شمېر نړيوالو کلپونو، ورزشي بنسټونو او په ځانګړي ډول لوبغاړو ته سخت مالي زيانونه اوښتي دي چې ددې چارې دوام ښايي د ورزش نړۍ نوره هم له ننګونو سره مخ کړي.
په ورته وخت کې ځينو کلپونو په انلاين ډول خپلو لوبغاړو ته د تمرين بهير جاري ساتلای دی. د ورزش برخې څېړونکو او څارونکو په وينا په دې کار سره ممکنه تر يو بريد د کرونا له اغېز څخه ځانونه خوندي کړل شي او په وينا يې ورزشي بهير هم دوام پيدا کړي.
څه موده وړاندې د هند کورنۍ کړکټ سترې سوداګريزې سيالۍ هم د کرونا ويروس ښکار شوې او تر نامعلومې مودې پورې وځنډېدې. که څه هم ددې ليګ مسؤلينو په لومړيو کې ډاډ ورکړی ؤ چې سيالۍ ته يې پوره تدابير نيولي او فکر نه کوي چې د کرونا له امله دې دغه لوبې ودروي، خو په هند کې د کرونا ويروس درېيمې څپې په زور اخيستو سره ددې هېواد مشران اړ شول چې د دغه ستر سوداګريز ليګ سيالۍ وځنډوي.