د کرېکټ ۲۰۲۶ کال شل اوریز نړیوال جام په ترڅ کې هند پاکستان ته د ۶۱ منډو په توپیر ستره ماتې ورکړه.
دا لوبه یکشنبه د فبرورۍ پر ۱۵مه د سرېلانکا په کولمبو لوبغالي کې وشوه.
پاکستان د ټاس له ګټلو وروسته د توپ اچونې پرېکړه وکړه.
هندۍ لوبډلې په ټاکلو شلو اورونو کې د اوو لوبغاړو په زیان ۱۷۵ منډې وکړې او سیالې لوبډلې ته یې د ۱۷۶ منډو موخه ورکړه.
په توپ وهنه کې د هند لپاره ایشان کېشان تر ټولو ډېرې ۷۷ منډې وکړې.
پاکستانۍ لوبډله بیا ونه توانېده چې ورکړل شوی هدف پوره کړي او له ۱۱۴ منډو جوړولو وروسته یې په اتلسم اور کې ټول لوبغاړي وسوځېدل.
د یادونې ده چې د هند او پاکستان تر منځ دا لوبه د پاکستان له خوا یو ځلې له بایکاټ وروسته کېږي او له همدې امله یې لا ډېر نړیوال پام خپل کړی دی.
دا دوه سرسخت سیالان په نړیوالو شل اوریزو کرېکټ لوبو کې اته وارې له یوه بل سره مخ شوي چې اووه لوبې یې هند او یوازې یوه یې پاکستان ګټلې.
