۸صبح، کابل: د افغانستان د کرېکټ ځلانده ستوري راشد خان په شلاوریزو نړیوالو سیالیو کې د ۲۰۰ وېکټو په ترلاسه کولو سره د نارینهوو د کرېکټ په تاریخ کې لومړنی توپاچوونکی شو چې دغه ریکارډ یې خپل کړ.
هغه پنجشنبه د لړم پر ۷مه، په شارجه ښار کې د افغانستان او زیمبابوې ترمنځ د دویمې لوبې پر مهال د نهم اوور په لړ کې د بابا تادیواناشه ماروماني په سوځولو سره خپله ۲۰۰مه وېکټه واخیسته.
دغه ۲۸ کلن لوبغاړي دا ریکارډ په خپله ۱۲۰مه شلاوریزه نړیواله لوبه کې ترلاسه کړی دی.
راشد خان تر اوسه دوه ځله په یوه لوبه کې پنځه وېکټې اخیستې دي او په یوه لوبه کې یې تر ټولو غوره لوبېدل د درېیو منډو په بدل کې د پنځو وېکټو اخیستل دي.
راشد خان د ۲۰۰ وېکټو په لرلو سره د نارینهوو د شلاوریزو نړیوالو سیالیو د ډېرو وېکټو اخیستونکو په نوملړ کې لومړی ځای لري او د انګلستان تر لوبغاړي عادل رشیده یې ۲۹ وېکټې ډېرې اخیستې دي.
نوموړي د تېر کال په اکټوبر کې هم د ابوظبۍ په لوبغالي کې له بنګلهدېش سره په لوبه کې لومړنی افغان توپاچوونکی شو چې په یو ورځنیو نړیوالو سیالیو (ODI) کې یې د ۲۰۰ وېکټو اخیستو ریکارډ خپل کړ.
