۸صبح، لوګر: په لوګر کې ځايي سرچینې وايي چې په دغه ولایت کې پلار خپل زوی او ناڅرګندو وسلهوالو یو قومي مشر وژلی دی.
سرچینو دوشنبه د چنګاښ پر ۲۵مه ویلي چې پرون غرمه د دغه ولایت محمداغې ولسوالۍ په کیشم کلي کې پلار خپل ۱۸ کلن زوی د چړو په ګوزارونو وژلی دی.
د دغې پېښې لامل کورنۍ تاوتریخوالی یاد شوی دی.
دغه راز، په یوه بله پېښه کې بیا د محمداغې ولسوالۍ په دهنو کلي کې ناپېژانده ټوپکوالو یو قومي مشر چې عبدالحبیب نومېده، وژلی دی.
ورته مهال، په لوګر کې د طالبانو امنیې قوماندانۍ هم د دغو پېښو پخلی کړی او زیاته کړې ده، هغه کس یې نیولی چې د خپل زوی پر وژلو تورن دی.
یادې قوماندانۍ ویلي چې هڅه کوي د وژل شوي قومي مشر عاملان هم پيدا کړي.
د یادونې ده چې په وروستیو اوونیو کې د هېواد په ګڼو ولایتونو کې جنايي پېښې ډېرې شوې دي.
بیګاه «وسلهوالو غلو» په کابل کې د بدخشان یو اوسېدونکی وژلی و.
