د کنـدهار په درېیـو ولسوالیو کې د خرما بـاغـونـه جـوړېـږي

له هلمند وروسته، تازه د کندهار په درېیو ولسوالیو، دامان، ډنډ او پنجوائي کې، د خرما د حاصلاتو د ترلاسه کولو په موخه، پر ۲۵ جرېبه زمکه، د خرما بڼونو د جوړولو چاري پېل شوې دي.
ددغې پروژې ټولي چاري، د کرني وزارت لخوا پر مخ بیول کېږي او دوه میلیونه افغانۍ لګښت پرې راځي.
د کندهار د کرنی او مالدارۍ رئیس سيد حفظ الله سیدي وایي چې د کوکنارو د بديلو کښتونو په لړ کې تمه لري، چې د خرما له ازمايښتي بڼونو ښه پايله ترلاسه کړي.
سیدي وايي چې د کندهار اوبه او هوا د ایران سیستان او نورو هغو سیمو سره چي خرما پکي ښه حاصل ورکوي، ورته والی لري؛ نو اړینه یې وبلله چې د کندهار په دامان ولسوالۍ کې هم د خرما بڼونه جوړ کړي.
نوموړی زیاتوي چې دغو بڼونو په هلمند کي ښه نتیجه ورکړي او اوس تمه لري چي په کندهار کي هم د خرما باغونه ښه حاصل ورکړي.
د کندهار د کرنې رئیس وايي هڅه کوي چې په کندهار کې د کرنیزو چارو د لاپیاوړتیا او د خلکو د اقتصاد د لوړولو په موخه نوي بوټي او کښتونه دود کړي.
سيدي وایي چې نوي اېښودل شوي نيالګي به تر راتلونکو پنځو کلونو پورې په حاصل راشي او که يې پایله مثبته وه؛ نو پراختيا به ورکړي.
د کندهار په دامان ولسوالۍ کې بزګران وايي چې د خرما بڼونو په جوړولو خوښ دي او وايي چې ورځ تر بلې د کرنې په برخه کې پرمختګونه کېږي چې په خبره یې دا د کندهار او ټول هېواد د اقتصادي پیاوړتیا لپاره ښه زېری دی .
هغوي وايي: په هلمند کې د خرما بڼونو ښه نتیجه ورکړې او د کندهار اب و هوا هم د خرما د حاصلاتو لپاره مناسبه ده.
دغه بزګران زیاتوي چې افغان دولت او په خاص ډول د کرنې چارواکي باید د نورو مېو د دودولو لپاره هم بزګرانو او بڼوالو ته امکانات برابر کړي.
د کرنې برخې کار پوهان وايي د کندهار د کرنې په برخه کې پرمختګونو ته باید لا زیات پام وشي او د کرنې برخې چارواکي باید ددې ولایت د مخکنیو او دودو حلالو کښتونو د ودې لپاره هم کار وکړي.
هغوي وايي چې په دې ورستیو کي لیدل کېږی چي د کندهار د انګورو ، انارو، انځرو، خټکیو او نور مېوو حاصلات د ځينی طبعي امراضو له امله کم شوي، چي د کرنې ریاست او په دې برخه کي مرستندویه ادارو یې په اړه کوم اقدام نه دی کړی.