۸صبح، کابل: د ملګرو ملتونو د پراختیايي پروګرام رئيس ډي کرو په افغانستان کې له زدهکړو له ۱۲ کلنو د پورته نجونو محرومول «په بشپړه توګه د نه منلو وړ » بللي دي.
ډي کرو له «فارن پالیسي» سره په خبرو کې ویلي چې له زده کړو د نفوس د نيمايي برخې لېرې کول د پرمختیا له نظره هم یوه کمزورې تګلاره ده.
هغه زیاته کړې چې افغانستان د خپلو پراخو ستونزو د حل لپاره د ټول نفوس وړتیاوو ته اړتیا لري.
ډي کرو ټینګار کړی چې له زدهکړو د نجونو محرومول په دې مانا دي چې د دغه هېواد د نيمايي نفوس له استعداد او وړتیا ګټه نه اخیستل کېږي.
هغه څرګنده کړې چې د ملګرو ملتونو پراختیايي پروګرام د ښځو د سوداګرۍ په برخه کې هم فعالیت کوي او له لسګونو زرو ښځو سره یې د کوچنیو کاروبارونو د پيلولو لپاره مرسته کړې ده.
د ملګرو ملتونو د پراختیايي پروګرام رئيس ویلي چې دغه بنسټ نږدې هره ورځ له طالبانو سره د ښځو او نجونو د حقونو په اړه خبرې کوي.
