۸صبح، کابل: سرچینې وايي چې د کابل پوهنتون محصلان له یوې اوونۍ راهیسې له لیلیې ایستل شوي دي.
د کابل پوهنتون ځينو محصلانو یکشنبه د لړم پر ۱۷مه ۸صبح ورځپاڼې ته ویلي چې نږدې یوه اوونۍ مخکې د شپې له خوا د طالب مسوولانو له خوا له لیلیې ایستل شوي دي.
د سرچینو په خبره، د دغو محصلانو ځينې یې پولتخنیک لیلیې ته لېږدول شوي او ځينې نور په کابل ښار کې کرايي کوټو ته تللي دي.
سرچینې وايي چې ټاکل شوې د همدې میاشتې په وروستیو کې په کابل پوهنتون کې د طالبانو د ملاتړو ملایانو غونډه جوړه شي.
د سرچینو په خبره، د دغې غونډې موخه د هبتالله اخوندزاده د فرمانونو، د امر بالمعروف او نهی عن المنکر قانون او د «اهل سنت والجماعت عقیده» په نوم کتاب د ارزونې او تطبیق څرنګوالی دی.
سرچینې وايي، طالب چارواکو د هېواد له ټولو ولایتونو خپل ملاتړي ملایان دې غونډې ته وربللي او د هغوی د میشتېدو لپاره یې د لیلیې د خونو د ترمیم او رنګمالۍ لپاره محصلان ایستلي دي.
دا په داسې حال کې ده چې محصلان د سمسټرونو د وروستیو ازموینو په درشل کې دي او د پوهنتون له چاپېریاله په لرې کېدو له ګڼو ستونزو سره مخ شوي دي.
