د امریکا ولسمشر ډونالډ ټرمپ وايي چې که د ایران د اټومي پروګرام په اړه خبرو کې پرمختګ وشي او هرمز تنګی بېرته پرانیستل شي، له ایران سره د جګړې بیا پیل به «ډېر لرې» وي.
سياېناېن خبري شبکې یکشنبه د نومبر پر ۸مه راپور ورکړی چې ټرمپ له ایران سره جګړې ته د امریکا د احتمالي بېرته ستنېدو په اړه د یوې پوښتنې په ځواب کې ویلي، دا خبره د تهران له خوا د «ډېر پیاوړي» تړون لاسلیکولو پورې تړلې ده.
نوموړي ادعا کړې چې ایران له شدیدو اقتصادي ستونزو سره مخ دی.
د امریکا ولسمشر زیاته کړې چې واشنګټن ایران ته درانه ګوزارونه ورکړي او که اړتیا وي، چمتو دی چې بیا هم پوځي برید وکړي.
ټرمپ ویلي چې ایران له مالي پلوه په کمزوري کېدو دی او امریکا د پوځي ګوزارونو ترڅنګ د دې وړتیا لري چې دا هېواد بشپړ له پښو وغورځوي.
