۸صبح، کابل: د افغانستان لپاره د ملګرو ملتونو ځانګړي اماني صندوق (UN-STFA) اعلان کړی چې په کندوز او بغلان ولایتونو کې څه باندې ۷۲ زره متره مربع ځمکه د جګړو د چاودېدونکو توکو له پاتې شونو پاکه شوې ده.
دغه صندوق پنجشنبه د لړم پر ۱۴مه، په یوه پیغام کې ویلي چې دا کار د «پايښت» د ګډې پروژې په چوکاټ کې او د دغه صندوق په مالي ملاتړ شوی دی.
د دغه صندوق په وینا، د ځمکو پر پاکولو سربېره، کورنیو ته د چاودېدونکو توکو د خطرونو په اړه هم پوهاوی ورکړل شوی دی.
دا په داسې حال کې ده چې د افغانستان ډېرې سیمې لا هم د جګړو د چاودېدونکو توکو په پاتې شونو ککړې دي.
د ملګرو ملتونو د راپورونو له مخې، افغانستان په نړۍ کې یو له هغو هېوادونو دی چې د ناچاودو مهماتو له امله پکې د مرګژوبلې کچه لوړه ده.
دغه سازمان خبرداری ورکړی چې د جګړو د چاودېدونکو توکو پاتې شوني او ناچاودي مهمات لا هم په افغانستان کې د ملکي وګړو، په ځانګړې توګه د ماشومانو لپاره جدي ګواښ ګڼل کېږي.
