۸صبح، کابل: د ملګرو ملتونو د پراختیايي پروګرام رییس الکساندر ډي کرو خبرداری ورکړی چې افغانستان ته د نړیوالې ټولنې شا کول ښايي په راتلونکو پنځو تر لسو کلونو کې سختې پایلې ولري.
ډي کرو له «فارن پالیسي» سره په خبرو کې ویلي چې له طالبانو سره له اختلافاتو سره سره، نړیواله ټولنه باید له افغانستان سره تعامل ولري؛ ځکه دغه هېواد له یو لړ اقتصادي، اقلیمي او بشري ناورینونو سره مخ دی.
هغه زیاته کړې چې افغانستان له نږدې ۲۰ سلنه اقتصادي انقباض، د اقلیمي بدلونونو له پایلو، طبیعي پېښو، له ګاونډیو هېوادونو سره د کړکېچونو او په تېر شاوخوا یو نیم کال کې له ایران او پاکستانه د نږدې پنځو میلیونو کډوالو له بېرته راستنېدو سره مخ شوی دی.
هغه ویلي که په لنډه موده کې د کډوالو د بېرته راستنېدو له امله د یوه هېواد نفوس له ۱۲ تر ۱۵ سلنې پورې زیات شي، د هېڅ هېواد لپاره د دې زیاتوالي مدیریت اسانه نه دی، له همدې امله افغانستان د دغو فشارونو د مدیریت لپاره د نړیوالې ټولنې ملاتړ ته اړتیا لري.
هغه ټینګار کړی چې نړیواله ټولنه باید له افغانستانه خپل ملاتړ د ښځو او نجونو د حقونو د خوندیتوب او د مدني فضا د پراخولو لپاره د فشار په توګه وکاروي.
