۸صبح، کابل: د افغانستان لپاره د امریکا سفارت شارژدافیره کېرن ډېکر وايي چې د سیمې له هېوادونو سره د افغانستان خلکو د ملاتړ څرنګوالي په هکله نږدې همکارۍ ته لېواله ده.
ډېکر دا څرګندونې پنجشنبه د تلې پر ۱۲مه په متحده عربي اماراتو کې له یو شمېر خبریالانو سره په یوې انلاین غونډه کې کړې دي.
هغې زیاته کړې ده: «زه واقعاً د سیمې له هېوادونو سره د افغانستان خلکو د ملاتړ څرنګوالي په هکله نږدې همکارۍ ته لېواله یم او زه هلته ډېر فرصتونه او ژمنتیا وینم.»
نوموړې څرګنده کړې چې امریکا د طالبانو تر واک لاندې افغانستان کې د خپلو مرستو څرنګوالي او په دغه هېواد کې پر افغانانو د بندیزونو د وضع کولو په هکله ښه بحثونه کړي دي.
د هغې په وينا، يو شمېر هېوادونه لا هم افغانستان ته د لومړيتوب په توګه ګوري او هلته لا هم ځیني بنسټونه شته چې د دغه هېواد په هکله پېښې او خبرې تنظيموي.
بل خوا ډېکر څرګنده کړې ده: «فکر کوم غواړم په یو ډول ووایم چې په سپتمبر کې واقعاً ډېره بوخته وم، او لکه څنګه چې تاسو له اعلامیې څخه خبر یئ، ټام وېسټ یو نوي موقف ته تللی او زه د متحده ایالاتو لپاره د افغانستان د ډیپلوماسۍ مشري په غاړه اخلم.»
نوموړې امریکايۍ ډیپلوماټې زیاته کړې چې سپټمبر میاشت یې په قزاقستان، ازبکستان، لندن او بروکسل کې د افغانستان په هکله مشورې کړې دي.
د یادونې ده چې ټام وېسټ په دې وروستیو کې د افغانستان لپاره د امریکا ځانګړي استازي په توګه له دندې استعغا کړې او کېرن ډېکر او دوه نور امریکايي چارواکي د هغه پر ځای ګومارل شوي دي.
د روانې اوونۍ سهشنبې ورځ د امریکا د بهرنیو چارو وزارت ویاند متیو مېلر هم ویلي و چې هېواد به یې د طالبانو تر کنټرول لاندې افغانستان سره خپلې همکارۍ ته دوام ورکړي.
که څه هم امریکا طالبان په رسمیت نه پېژني، خو په تېرو درېیو کلونو کې یې د دغې ډلې تر کنټرول لاندې افغانستان سره میلیاردونه ډالره مرسته کړې ده.
