۸صبح، کابل: د امریکا د بهرنیو چارو وزارت ویاند متیو مېلر وايي چې متحده ایالات طالبان د یوه «ترهګریز سازمان» په توګه پېژني او په وینا یې، دا لړۍ به همداسې دوام لري.
مېلر سهشنبه د تلې پر ۱۷مه په یوې خبري غونډه کې ویلي چې د افغانستان پر وړاندې د امریکا لومړیتوب دا دی چې هېڅکله ونه شي کړای دا هېواد د «ترهګریزو» بریدونو ډګر شي.
هغه زیاته کړې: «د افغانستان پر وړاندې زمونږ مهمه لېوالتیا دا ده او وي به چې دا هېواد هېڅکله ونه شي کړای د متحده ایالاتو پر وړاندې د ترهګریزو بریدونو ډګر شي اوهمداراز مونږ به د متحده ایالاتو او د متحدینو پر وړاندې هر ډول ترهګریز ګواښ ته ډېر هوښیار یو.»
د هغه په وينا، امريکا د افغانستان له خاورې د «ترهګريزو» بريدونو د مخنيوي لپاره خپلې وړتياوې ساتي.
د امریکا د بهرنیو چارو وزارت ویاند ویلي چې طالبان پر ښځو او نجونو د بندیزونو وضع کولو ته دوام ورکوي.
نوموړي امریکايي چارواکي څرګنده کړې چې امریکا له خپلو متحدینو سره کار کوي چې د ښځو او نجونو پر وړاندې د تبعیضي سیاستونو په موخه پر طالبانو فشار راوړي.
د مېلر د څرګندونو پر بنسټ، له طالبانو سره د اړیکو په عادي کولو کې د هر مهم ګام اخیستل له افغان ښځو او نجونو سره د دغې ډلې د چلند ښه کېدو پورې تړاو لري.
له دې مخکې امریکايي چارواکو ټینګار کړی و چې په افغانستان کې د یوه ټولګډوني حکومت له جوړېدو او د بشري حقونو په ځانګړې توګه د ښځو او نجونو حقونو ته له درناوي پرته به طالبان په رسمیت ونه پېژني.
دا څرګندونې په داسې حال کې کېږي چې تېره میاشت د امریکا د ولسمشریزو ټاکنو ته د جمهوري غوښتونکي ګوند نوماند ډونالډ ټرمپ مرستیال جيډي وینس ویلي و چې طالبان او القاعده په افغانستان کې په ګډه فعالیت کوي.
