۸صبح، کابل: د امریکا د بهرنیو چارو وزارت ویاند متیو مېلر وايي چې د طالبانو په هکله د واشنګټن دریځ روښانه دی.
مېلر دا څرګندونې دوشنبه د لیندۍ پر ۱۲مه د یوې خبري غوڼدې پرمهال مطرح کړې دي.
هغه زیاته کړې ده: «زه فکر کوم چې موږ د طالبانو په هکله او په افغانستان کې له خلکو په ځانګړې توګه د ښځو او نجونو څخه د دغې ډلې د ناوړه ګټېاخیستنې په اړه خپل دریځ بیخي روښانه کړی دی.»
څه موده مخکې د امریکا د بهرنیو چارو وزارت ویاند په یوې خبري غونډه کې ویلي و چې طالبان د ښځو او نجونو پر وړاندې محدودیتونو ته دوام ورکوي.
هغه څرګنده کړې وه چې امریکا له خپلو متحدینو سره کار کوي څو د ښځو او نجونو پر وړاندې د تبعیضي سیاستونو په موخه پر طالبانو فشارونه راوړي.
د مېلر د څرګندونو پر بنسټ، له طالبانو سره د اړیکو په عادي کولو کې د هر مهم ګام اخیستل له افغان ښځو او نجونو سره د دغې ډلې د چلند ښه کېدو پورې تړاو لري.
له دې مخکې امریکايي چارواکو ټینګار کړی و چې په افغانستان کې د یو ټولګډوني حکومت له جوړېدو او د بشري حقونو په ځانګړې توګه د ښځو او نجونو حقونو ته له درناوي پرته به طالبان په رسمیت ونه پېژني.
