۸صبح، کابل: د افغانستان لپاره د امریکا ځانګړي استازي ټام وېسټ، د افغانستان لپاره د ملګروملتونو سازمان د بشري حقونو شورا د ځانګړي راپور ورکوونکي ریچارد بنت له کاره د لا زیات ملاتړ غوښتنه کړې ده.
د افغانستان لپاره د امریکا ځانګړي استازي پنجشنبه د سلواغې پر ۱۵ په یوه ټویټ کې ویلي چې د شپږ ورځني سفر په لړ کې سویس ته رسېدلی دی.
وېسټ ویلي چې په جینوا ښار کې یې د روغتیا نړیوال سازمان، د کډوالۍ نړیوال سازمان له استازو او په سویس کې د امریکا سفارت له مسوولینو سره کتنه او خبرې اترې کړې دي.
ټام وېسټ ویلي: «د افغانستان په چارو کې د ملګروملتونو سازمان د بشري حقونو شورا د راپور ورکوونکي له دفتر سره په اړیکه کې یم. د بشري حقونو په تېره بیا د ښځو او نجونو د وضعیت په خرابېدو سره موږ باید د هغه له کاره ملاتړ وکړو.»
د افغانستان لپاره د امریکا ځانګړي استازي ټینګار کړی چې د طالبانو سیاستونه میلیونونه تنو ته د بشردوستانه مرستو لېږل له ګواښ سره مخ کوي.
توماس ویست تېره اونۍ د افغانستان د مسایلو په تړاو پاکستان، سویس او جرمني ته شپږ ورځنی سفر پیل کړ.
