۸صبح، کابل: د افغانستان لپاره د اروپايي ټولنې له ځانګړي استازي توماس نیکولسن او د اروپايي ټولنې له شارژدافېرې رافایلا یودیچي د طالبانو د رژیم د رییس الوزرا سیاسي مرستیال مولوي عبدالکبیر ته ویلي، چې انحصاري واکمني به یې دوامداره نه وي او وبه نړیږي.
د مولوي کبیر دفتر وایي، چې اروپایي پلاوي له نوموړي سره د لیدنې پر مهال ویلي: ((د طالبانو امارت دې له خپلې اډانې څخه بهر د متخصصو او باتجربه افغانانو سلاء مشورې هم واوري، ځکه د افغانستان تېر حکومت هم همدې انحصار ونړاوه.))
سرچینه زیاتوي، چې اروپایي ټولنې په ورته مهال له سیاسي مسایلو پرته له افغانستان سره د بشري مرستو د دوام ډاډ ورکړی او ویلي، چې دوی د خبرو له لارې د افغانستان د ستونزو حل غواړي.
مولوي عبدالکبیر په دې لیدنه کې ویلي:(( افغانستان د اروپایي ټولنې نقش ته د قدر په سترګه ګوري، هیله ده تاسې زموږ او اروپایي ټولنې ترمنځ د دغو اړیکو په لا پیاوړتیا کې اغېزناک رول ولرئ.))
دا په داسې حال کې ده، چې په وروستیو کې یو شمېر افغانان د طالب مشرانو د لیدنو په حواله د اروپايي استازو خپریدونکو څرګندونو ته په غوسه دي او طالبانو ته په لابي کولو یې تورنوي.