په داسې حال کې چې د اوکراین د باخموت سیمې په ځینو برخو کې د جګړې لمن پراخېږي، اروپایي ټولنې او کاناډا د روسیې پروړاندې د نویو بندیزونو خبر ورکړی دی.
د اروپایي ټولنې د بهرني سیاست مسوول جوزپ بورل او د کاناډا د بهرنیو چارو وزیرې ملاني جولي جمعه شپه د فبرورۍ پر درېیمه نېټه په جلا ټویټونو کې د روسیې پر ضد د نویو بندیزونو په اړه ویلي دي.
بورل ویلي: «موږ د اوکراین ترڅنګ له دغه هېواده د دفاع په هڅه کې یو. پر اوکراین د تېرې په دوام کې د روسیې د پیاوړتیا د له منځه وړلو لپاره نوي بندیزونو پر لاره دي.»
ظاهراً د اروپایي ټولنې لوړپوړي پلاوي، چې له دوو ورځو راهیسې له اوکراینه د لیدنې په حال کې دی د اوکراین له ولسمشر ولادیمیر زلنسکي سره په لیدنه کې یې د روسیې پروړاندې د لا زیاتو بندیزونو موضوع هم مطرح کړې ده.
په همدې حال کې د کاناډا د بهرنیو چارو وزیرې ملاني جولي ویلي، چې اوکراین کې د پوتین جګړه د دروغو او دوکې پر بنسټ ده.
اغلې جولي زیاتوي: «موږ ۳۸ تنه او ۱۶ بنسټونه، چې د روسیې په ګټه په تبلیغاتو کې شریک دي، تحریموو.»
د ویلو ده، چې د پسرلي په رانږدې کېدو له روسیې سره د اوکراین له جګړې د ملاتړ لپاره د لوېدیځ هېوادونو لور نیونې زیاتې شوې دي.
