۸صبح، کابل: د طالبانو تر کنټرول لاندې اریانا افغان هوايي شرکت د کندهار او دوبۍ ترمنځ د مستقیمو الوتنو د پیلېدو خبر ورکړی دی.
دغه شرکت شنبه د لړم پر ۲۳مه، اعلان کړی چې د دې هوايي مسیر الوتنې به د روان کال د ليندۍ میاشتې له لومړۍ پیل شي.
د اریانا افغان هوايي شرکت په وینا، د دې هوايي مسیر په فعالېدو سره به د طالبانو او متحده عربي اماراتو ترمنځ د سوداګرۍ، پانګونې او اقتصادي اړیکو د پراختیا لپاره نوي فرصتونه برابر شي.
دغه شرکت ویلي چې مسافر کولای شي د دې مسیر ټکټونه د شرکت له مرکزي دفتر، رسمي استازولیو او ګرځندوی شرکتونو ترلاسه کړي.
دغه راز، د دې الوتنو ټکټونه د هوايي ډګرونو دننه د اریانا شرکت له استازولیو هم ترلاسه کېدای شي.
