د استانبول ناستې د وخت پر سر اختلاف؛ طالبان له روژې وروسته د ناستې غوښتونکي دي

د ټاکنو پر بهیر ځینو څارونکو له ۸صبح سره په خبرو کې ددغې ناستې د جوړېدو د وخت په اړه د استانبول ناستې د ګډون کوونکو ترمنځ د نظر د اختلاف خبر ورکړی دی.
ټاکل شوې وه چې د اپریل په ۱۵مه نېټه دغه غونډه جوړه شي. سرچینې وايي چې طالبانو ډلې وړاندیز کړی چې دا ناسته د روژې له مبارکې میاشتې وروسته ترسره شي.
ددغې سرچینې په وینا، ترکیې او سیمې ته د افغانستان د سولې په چارو کې د امریکا د ځانګړي استازي زلمي خلیلزاد سفر چې تازه پیل شوی، د استانبول غونډې د وخت او نورو تخنیکي مسایلو په اړه دی. سرچینې وايي چې طالبانو د اپریل په ۱۵مه د استانبول غونډې له جوړېدو سره مخالفت کړی دی.
دغو سرچینو چې د سولې پر بهیر څارنه کوي، باوري دي چې د استانبول غونډې د وخت پر سر اختلاف، امریکا او د دغه هېواد ځانګړی استازی له سختو شرایطو سره مخامخ کړی دی. اوس ددې احتمال شته چې دا ناسته وځنډول شي.
د سرچینو په وینا، ترهغه چې د استانبول په غونډه کې د لارې د یوې نقشې پر سر هوکړه ونه شي، په افغانستان کې به د امریکايي ځواکونو برخلیک روښانه نه شي. له همدې امله ښايي چې د بهرنیو ځواکونو د وتلو مهال وېش چې د دوحې په موافقه کې مې میاشت ټاکل شوې ده وغځول شي.
د موثقو سرچینو د مالوماتو پربنسټ، ټاکل شوې وه ولسمشر غني د استانبول په غونډه کې ګډون وکړي، خو طالبانو د هغه له ګډون سره مخالفت کړی دی. سرچینې وايي چې محمد اشرف غني د استانبول په ناسته کې د ګډون لپاره چمتووالی اعلان کړی و.
له دې مخکې رپوټ ورکړ شوی و چې ولسمشر غني د استانبول په ناسته کې له وخته مخکې ټاکنو د ترسره کېدو طرحه وړاندې کوي. دا طرحه چې د زلمي خلیلزاد له خوا د وړاندې شوې انتقالي دولت طرحې په وړاندې برابره شوې، په راتلونکو شپږو میاشتو کې د ولسمشرۍ ټاکنو وړاندیز پکې شوی دی.
کارپوهان په دې اند دي چې د تېرو کلونو ټاکنو او د درغلیو تورونو او جنجالي کېدو ته په پام سره، له وخته وړاندې ټاکنې د سولې غوټه نه شي پرانیستی.
د استانبول غونډه چې ټاکل شوې د ملګروملتونو سازمان په مدیریت او د امریکا په ملاتړ جوړه شي، د سولې بهیر د برخلیک لپاره مهمه بلل کېږي.
د ملي روغې جوړې د عالی شورا رییس عبدالله عبدالله، وېلي چې دا ناسته به د افغانستان لپاره برخلیک ټاکونکې وي.