۸صبح، غور: په غور درېيو باوري سیمهییزو سرچينو منلې چې له وروستي سېلاب وروسته د دغه ولايت په يوې سيمه کې څو قلمه تاريخي اثار ترلاسه شوي او طالبانو په دې هکله رسنيو ته څه نه دي ويلي.
سرچينې شنبه د غبرګولي پر ۵مه صبح ورځپاڼې ته ويلي چې طالبانو دغه لرغوني اثار د غور جام درې او د جام څلي په څو کيلومټرۍ کې موندلي؛ خو تر يوې اونۍ وروسته يې په دې هکله رسنيو او خلکو ته جزئيات نه دي ورکړي.
ورته مهال سرچينې وايي چې ښايي دا لرغوني اثار په غور کې د طالبانو د انکار او پټولو په پايله کې ورک او يا په تور بازار کې وپلورل شي.
د معلوماتو له مخې، ځينې موندل شوي اثار فلزي لوښي دي چې تاریخي مخینه لري.
یوې بلې سرچینې ۸صبح ورځپاڼې ته ویلي چې د دې ډلې یو ځینو نورو غړو «په شخصي ډول ویلي چې دا اثار د غور امنیتي استازي [په غور کې د طالبانو د استخباراتو] په حضور کې ثبت شوي؛ خو خبریالانو ته نه شي ویلای ځکه اجازه نه لري.»
دا موضوع چې د غور د فرهنګیانو له خوا «پټکاري» بلل کېږي، ګڼ شکونه یې رامنځته کړي دي.
د لندن اکسفورډ پوهنتون څېړونکی او د (غور تاریخي اسنادو) کتاب لیکوال نبي ساقي په خپله فېسبوکپاڼه کې ویلي چې د سېلابونو په پایله کې د ۱۴ او ۱۵ قلمونو ترمنځ لرغوني اثار موندل شوي دي.
ښاغلي ساقي لیکلي چې د موندل شویو لرغونو اثارو ماهیت نه؛ بلکې تاریخي مخینه مهمه ده.
په غور کې د طالبانو د اطلاعاتو او کلتور رياست په رسمي ډول په دې هکله څه نه دي ويلي.
د جام دره د غور ولايت يوه لرغونې سیمه بلل کېږي چې له تېرو څو کلونو راهيسې په کې ناقانونه کېندنې او استخراج روان دی.
