وروستیو ورځو کې د پخوانیو پوځیانو د وژلو خبرونه خپاره شوي دي. تېره اوونۍ یوه ويډیو خپره شوه، چې ښکاري تخار کې یو طالب قوماندان د ولسي پاڅونوالو یو غړی په وسلې وژني. وروسته په ډاګه شوه، چې پخواني حکومت کې د دغه طالب قوماندان زوی د ولسي پاڅونوالو د هماغه غړي له لوري وژل شوی دی. دا ځوان تازه له ایرانه راګرځول شوی و او غوښتل یې بېرته له خپلې کورنۍ سره یوځای شي.
د لړم پر اتلسمه تخار کې د پخواني حکومت د پوځیانو د ترور یوه بله پېښه وشوه. طالب ځواکونو نیمروز کې د سرحدي ځواکونو د کنډک ارکان رییس شعیب اریايي او د سرحدي ځواکونو غړی سهراب حقاني وواژه. دې دوو غوښتل د طالبانو د عمومي بښنې له فرصت څخه په ګټې اخیستنې، د چاهآب ولسوالۍ شینګ سقاو کلي ته لاړ شي، چې د ځايي طالب ځواکونو له کمین سره مخامخ او ووژل شول.
د جمعې پر ورځ د لړم پر یوویشتمه دوه نورې پېښې وشوې. نامالومه وسلوالو د جمعې پر شپه ګردیز ښار کې د پخواني حکومت دوه ښځينه افسرانې ووژلې. همدارنګه د اردو بریدمل شایق سنجني، چې د بګرام ولسوالۍ د پولیسو پخوانی قوماندان و، د کاپیسا د کوهستان حصه اول ولسوالۍ کې ووژل شو. د دغه پخواني پوځي د خپلوانو په خبره، نوموړي د اردو ۱۱۱ فرقې کې کار کاوه او طالب ځواکونو لومړی له کوره ونیوه او وروسته یې په مرمیو وویشت.
هغه څه چې روښانه دي، تراوسه د طالبانو د عمومي بښنې فرمان عملي شوی نه دی. لوړپوړو طالب چارواکو د واک په لومړیو کې وویل، له پخوانیو پوځيانو سره کار نه لري، خو دا پوځيان په سیستماتیک ډول ترورېږي. د طالبانو چارسمبالی حکومت هم په دې اړه روښانه دریځ نه نیسي، چې دا پوځیان ولې وژل کېږي. د ترورونو نورې ډېرې پېښې هم کېږي، خو رسنۍ ترې خبرې نه دي. ځينو سرچینو د پخوانیو ۴۳ پوځيانو لېست له ۸صبح ورځپاڼې سره شریک کړی، چې په وروستیو ورځو کې په ارزګان کې د نامالومه کسانو له لوري وژل شوي یا تښتول شوي دي. دې ډله کې ان د ماشومانه څخه هم یادونه شوې ده.
ښکاري چې د پخوانیو پوځيانو ترور او نیول په درېیو دلایلو کېږي. لومړی دا چې دا پوځيان د دوي د شالید یا د طالبانو په اړه د پخوانۍ بدبینۍ له امله په نښه کیږي. دویم دا چې طالب ځواکونه د دوي د کورونو د تلاشۍ پر مهال د وسلو او نورو پوځي تجهیزاتو غوښتنه کوي، که دوې لږ انکار هم ورکړي، نیول یا وژل کېږي. درېیم هم د طالبانو کسان یا له دوي سره تړلي له فرصته په ګټه اخیستنې، خپلې شخصي دوښمنۍ پر مخ بیايي یا هغه کسان، چې وروسته به سرخوږی ورته جوړ کړي، له منځه وړي. ځينو مواردو کې کېدای شي، پخواني پوځیان پر داسې کار لاس پورې کړي، چې د طالب ځواکونو د غبرګون لامل شي.
دا پېښې که هر ډول رامنځته کېږي، د طالبانو سرپرست حکومت یې مسوول او ځواب ویونکی دی. اوس جګړه پای ته رسېدلی او د دغو پوځيانو وژل به جګړه دوامداره کړي. دا چې عمومي بښنه اعلانېږي او څوک پام ورته نه کوي، دوه خبرې دي. لومړی دا چې په عمل کې هېڅ ډول عمومي بښنه اعلان شوې نه ده، یا دا چې طالب ځواکونه د خپلو مشرانو امر ته سر نه ږدي. ډېرو ځایونو کې لیدل شوي، چې طالب مشران پر خپلو ځواکونو اړین کنترول نه لري. د طالبانو د چارسمبالي حکومت د دفاع وزیر وايي، له پخوانیو پوځيانو سره دې ناوړه چلن نه کېږي، خو لا هم د پخوانیو پوځيانو وژل دوام لري.
د طالبانو د چارسمبالي حکومت د بهرنیو چارو وزیر وروستۍ څرګندونې هم د پخوانیو پوځیانو پر وړاندې د طالب مشرانو بدبیني څرګندوي. امیرخان متقي پاکستان کې ویلي، پخواني پوځيان به د طالبانو په اردو کې ځای ونه لري. دا په داسې حال کې ده، چې هغوي پخوا ویلي و، چې پخواني پوځيان به نوې اردو کې ګماري. د امیرخان متقي له دې څرګندونو ښکاري، چې ممکن طالبانو د اعلان کړې عمومي بښنې له اعلانه پښېمانه وي.
له بده مرغه د دې وضعیت دوام به هېواد ته ناوړه پاېلې ولري. طالبان دې پر خپلو کړیو ژمنو عمل وکړي. هغوي د عمومي بښنې ژمنه کړې وه او ویلي و، چې له پخوانیو پوځیانو سره کار نه لري. دا ځواکونه د یوې مړۍ ډوډۍ پېداکولو په موخه له اردو سره یوځای شوي وو. هغوي په پخواني حکومت کې ډېرې ستونزې وګاللې او ان له برخلیک سره یې لوبې وشوې. بیا دې د طالبانو د ټيټ پوړو ځواکونو قرباني کېږي نه.
که حالت همداسې دوام وکړي، د پخوانیو پوځیانو خبرداری به عملي شي. هغوي ویلي و، که ځاني امنیت ته یې پام ونه شي، پر هر کار به لاس پورې کړي، چې دا د افغانستان ثبات له ګواښ سره مخ کوي. طالبان دې د ۴۰ کلنې غمیزې د پای ته رسېدو دا فرصت له لاسه نه ورکوي. د پخوانیو پوځيانو وژل به نورو ډلو په ځانګړې توګه داعش ته ښه فرصت په لاس ورکړي. طالبان دې ومني، چې د پخوانیو پوځیانو د وژنو دوام سره افغانستان یوې لویې کندې ته غورځي او لومړی به د طالبانو سرپرست حکومت له جدي ننګونو سره مخ کړي.
