په افغانستان کې وچکالي؛ کابو سل زره ماشومان له خوارځواکۍ کړېږي

د ملګروملتونو سازمان له ماشومانو د ملاتړ بنسټ یونیسف اعلان کړی چې په افغانستان کې د وچکالۍ له امله څه د پاسه سل زره ماشومان له خوارځواکۍ سره مخامخ دي.
په افغانستان کې د دغه بنسټ استازولۍ د چنګاښ په ۱۵مه نېټه پر خپله ټویټر پاڼه لیکلي چې په افغانستان کې وچکالي ۱۱۰ زره ماشومان له خوارځواکۍ سره مخامخ کولای شي.
د یونیسف د اعلان له مخې، په اوسني وخت کې په افغانستان کې ۲،۸ میلیونه ماشومان له خوارځواکۍ کړېږي.
یونیسف ویلي چې دغه بنسټ په ۲۰۲ میلادي کال کې د نورو نړیوالو ادارو په مرسته د هغو ۳۰۰ زره ماشومانو درملنه کړې چې په خوارځواکۍ اخته وو.
له بلې خوا، اروپايي ټولنې پر ټویټر لیکلي چې د وچکالۍ له امله په افغانستان کې یوولس میلیونه وګړي د خوراکي توکو له کمښت سره مخامخ دي او ۳،۲ میلیونه نور خوړو ته د لاسرسي په ناوړه وضعیت کې دي.
له دې امله دغې ټولنې خوراکي توکو ته د سختو اړمنو وګړو لپاره د بشردوستانه مرستو په چوکاټ کې ۲۵ میلیونه یورو په پام کې نیولې دي.
اټکل شوی چې په روان کال کې به په افغانستان کې د وچکالۍ له امله کرنیز حاصلات په تېره بیا غنم کم وي.
افغان دولت اعلان کړی چې د وچکالۍ له امله زیانمنو سره د مرستې لپاره ځانګړي پروګرامونه لري.