۸صبح، کابل: تازه څېړنې ښيي چې سویس په دغه هېواد کې پر جرمونو محکومو افغانانو د ایستلو لپاره په جنیوا کې د طالبانو د یوه پلاوي د کوربتوب لپاره څه باندې ۱۶ زره امریکايي ډالره لګښت کړی دی.
«سویس اینفو» رسنۍ شنبه د لړم پر ۲مه راپور ورکړی چې د «واو» څېړنیزې ډلې له خوا ترلاسه شوي اسناد ښيي چې د طالبانو د پلاوي د سفر لګښت شاوخوا ۱۶ زره او ۲۵۰ امریکايي ډالره و.
دا پلاوی د ۲۰۲۵ کال په اګست میاشت کې سویس ته تللی او دوه شپې یې د جینوا په «موونپیک» هوټل کې تېرې کړې دي.
د راپور له مخې، د دغه سفر موخه د هغو ۱۳ افغانانو پېژندل و چې په سویس کې پر جرمونو محکوم شوي او د یاد هېواد حکومت غوښتل له خپلې خاورې یې وباسي.
اسناد ښيي چې سویسي چارواکو د هغو کسانو شخصي معلومات طالبانو ته سپارلي چې د ایستلو پلان یې درلود.
د کډوالو د حقونو کارپوهانو خبرداری ورکړی چې له طالبانو سره د دغو کسانو د شخصي معلوماتو شریکول ښايي د هغوی امنیت له ګواښ سره مخ کړي.
دې چارې د طالبانو رژیم ته د مشروعیت ورکولو په اړه هم اندېښنې راپارولې دي.
د راپور پر بنسټ، د طالبانو څلورو استازو په جنیوا کې د دوو شپو د سفر او استوګنې لګښتونه هم ترلاسه کړي دي.
