۸صبح، کابل: د افغانستان لپاره د پاکستان پخوانی ځانګړی استازی اصف درانی وایي، د طالبانو دا ټینګار چې «تحریک طالبان پاکستان (ټيټيپي) د پاکستان خپله ستونزه ده»، ښيي چې دا ډله نه غواړي د ټيټيپي پر وړاندې اقدام وکړي.
دراني جمعه د زمري پر ۹مه، پر خپله اېکسپاڼه کې لیکلي چې د طالبانو دغه دریځ په افغانستان کې د دې ډلې له بیا واکمنېدو راهیسې دوام لري او د پاکستان او طالبانو ترمنځ یې د باثباته اړیکو د رامنځته کېدو بهیر سخت کمزوری کړی دی.
هغه زیاته کړې چې له همدې امله د ترکیې، قطر، سعودي عربستان او چین د منځګړتوب هغو هڅو هم چې د طالبانو او اسلاماباد ترمنځ د کړکېچ د کمولو لپاره شوي، تر اوسه کومه پایله نه ده ورکړې.
د افغانستان لپاره د پاکستان پخواني ځانګړي استازي همداراز ویلي، د طالبانو چلند ښيي چې دوی د اسلاماباد د مشروع امنیتي اندېښنو تر له منځه وړو له ټيټيپي سره اړیکو ته لومړیتوب ورکوي.
د دراني په وینا، دا چلند په داسې حال کې د اندېښنې وړ دی چې طالبان په بدخشان کې د نا ارامیو په ګډون له مخ پر زیاتېدونکو کورنیو ستونزو سره مخ دي.
هغه خبرداری ورکړی چې له کورنيو فشارونو سره هممهاله د پاکستان د امنیتي اندېښنو له پامه غورځول ښايي د پاکستان او طالبانو ترمنځ دوهاړخیزې اړیکې او د سیمې وضعیت لا پسې بېثباته کړي.
