۸صبح، کابل: د ملګرو ملتونو د بشري مرستو د همغږۍ دفتر (اوچا) وایي چې د ۲۰۲۵ کال وچکالۍ د افغانستان په شمالي او لوېدیځو سیمو کې ۳.۴ میلیونه کسان اغېزمن کړي دي.
اوچا دوشنبه د غويي پر ۱۴مه، په یوه پیغام کې ویلي چې دې وچکالۍ کرنیزو حاصلاتو او مالدارۍ ته زیان رسولی دی.
اوچا زیاته کړې چې د دغه بنسټ شریکان د افغانستان د اماني صندوق په ملاتړ د خوراکي مرستو پر برابرولو بوخت دي.
دې ادارې ټینګار کړی چې لا هم نورو بېړنیو مرستو ته اړتیا شته.
ملګرو ملتونو تر دې وړاندې اعلان کړی و چې په ۲۰۲۶ کال کې په افغانستان کې نږدې ۲۲ میلیونه کسان بشري مرستو ته اړتیا لري.
افغانستان په وروستیو کلونو کې له سختو او ویجاړوونکو وچکالیو سره مخ شوی دی.
