۸صبح، کابل: د مصور بنسټ لخوا د ماشومانو لپاره د لسو چاپ کړل شويو اثارو مخکتنه پرون د افغانستان په علومو اکاډمي کې ترسره شوه.
په دې کتابونو کې ۸ د کيسو او ۲ شعري مجموعې دي. دوه يې ژباړل شوي او اته نور يې پنځول شوي دي. د دې اثارو ليکوال ۹ يې ښځې او يو یې نارینه دی.
«توره سپوږمۍ، ښاپېرۍ او غاټول، پښتو الفبا، شتمنې پیشوګانې بنجاره، بلمنګه ګیدړه، مرغۍ او لمرګلی، ورو او ستوری، شهزاده او خیاط او شنه پاڼه او سره مماڼه» د دغو کتابونو نومونه دي.
په همدې تړاو جوړې شوې غونډه کې د علومو اکاډمۍ رئیس عبدالظاهر شکیب وویل: «د یوې ټولنې یا هېواد راتلونکي سیاسي، اقتصادي، فرهنګي او ټولنیز مسوولیتونه او د ژوندانه نورې چارې به د اوسنیو ماشومانو د پوهې په مرسته رهبري کېږي او د پرمختګ پړاوونه به وهي؛ یعنې په حقیقت کې د یوې ټولنې نېکمرغي او روښانه مستقبل به اوسني ماشومان جوړوي.»
په دغه غونډه کې د مصور بنسټ په استازولۍ امیرجان احمدزی د مصور بنسټ پر تاریخچې رڼا واچوله، ویې ویل، تر اوسه دې بنسټ ۶۷ کتابونه د ماشومانو د ادب په اړه چاپ کړي چې په دې کتابونو کې ژباړې او د افغاني لیکوالانو اثار هم شته.
د مصور بنسټ په اړه لنډ پریزنټېشن د دې بنسټ د اوسنۍ مشرې شفیقې خپلواک لخوا وړاندې شو چې په کې يې د ياد بنسټ کړنو او فغاليتونو په اړه يې معلومات وړاندې کړل.
د ولسمشر فرهنګي سلاکار اسدالله غضنفر هم غوڼده کې ګډون او وينا وکړه، نوموړي په خپلو خبرو کې وويل: «د ماشومانو لپاره بايد داسې کتابونه وليکل شي چې پر هغوی بار زيات نه شي او هم هغوی ته په کتابونو کې د اخلاقي مسايلو په اړه مثالونه او مصداقونه د تېر په پرتله بدل وړاندې شي.»
نوموړي علومو اکاډمي ته وړانديز وکړ، په نصاب کې چې د ماشومانو لپاره کوم کتابونه کښل شوي، پر هغو دې څېړنه وکړي او نيمګړتياوې دې يې په ډاګه کړي، ترڅو په راتلونکي کې ورته پاملرنه وشي.
ورپسې، د هېواد مخکيني ولسمشر حامد کرزي د ټيلفون له لارې خپل پیغام د غونډې ګډونوالو ته واوراوه او ويې ويل، د روښانه راتلونکي لپاره باید د ماشومانو ادب ته په ښه توګه کار وشي.
دغه راز د کابل پوهنتون استاد، اجمل ښکلي د نصاب پر کتابونو د نيوکې کولو ترڅنګ چې ماشومانو ته يې سخت مفاهيم په کتابونو کې ځای کړي، وړانديز وکړ چې ماشومانو ته دې د هغوی له چاپېريال سره سم کتابونه او مفاهيم وړاندې شي.
د پوهنې وزارت د نشراتو رئيسې ليلا ساماني هم د ماشوم ادب د ارزښت او اهميت په اړه خبرې وکړې.
غونډه د مینا نظري او نعیمې غني د مقالو په لوستلو سره پايته ورسېده.
