۸صبح، کابل: د روسیې د بهرنیو چارو وزیر سرګي لاوروف د «مسکو فارمټ» په اتمه غونډه کې وویل چې هېواد یې په افغانستان او د دغه هېواد په ګاونډیو هېوادونو کې د ناټو پوځي حضور نه مني.
لاوروف دوشنبه د تلې پر ۱۳مه، په دې غونډه کې وویل چې په افغانستان او سیمه کې د ناټو پوځي حضور کولای شي د بېثباتۍ او د شخړو د زیاتېدو لامل شي.
د روسیې د بهرنیو چارو وزیر ټینګار وکړ چې مسکو به افغانستان ته د بشري مرستو لېږلو ته دوام ورکړي.
په دې غونډه کې د روسیې، ایران، هند، قزاقستان، چین، قرغیزستان، پاکستان، تاجکستان او ازبکستان استازي او چارواکي ګډون لري.
د افغانستان په تړاو د «مسکو فارمټ» اتمه غونډه نن، دوشنبه، د تلې پر۱۳مه، د سیمې د هېوادونو د ځانګړو استازو او چارواکو په ګډون په مسکو کې پیل شوه.
د افغانستان د وضعیت او د دغه هېواد په تړاو د رامنځته شویو بدلونونو ارزونه، په ځانګړې توګه د طالبانو او پاکستان ترمنځ وروستۍ ترینګلتیا د دې غونډې له مهمو بحثونو بلل شوي دي.
